Fatmir Vata, Altin Lala, Ervin Skela dhe Ervin Fakaj jane katër shqiptarët që luajnë në Gjermani.



Çfarë dhanë kuqezinjtë e Bundesligës për 2002-in?
Katër futbollistët e Kombëtares Shqiptare, të cilët aktivizohen me skuadrat gjermane të Bundesligës 1 dhe 2, janë vlerësuar me nota pozitive nga shtypi sportiv gjerman, në mbyllje të vitit kalendarik sportiv të 2002-shit. Fjala është për Fatmir Vatën e Arminias së Bielefeldit, Altin Lalën e Hanover 96, Ervin Skelën e Eintrahtit të Frankfurtit dhe Ervin Fakajn e Duisburgut.

Le të urojmë të jetë i suksesshëm për ta edhe viti që sapo ka nisur. Nëse mesfushori-sulmues i kuqezinjve tanë, Fatmir Vata, ka filluar të mendojë për ndonjë transferim të mundshëm në Angli, interesime të këtij lloji kanë filluar të shfaqen edhe për shtatshkurtrin e Hanoverit, Altin Lalën, i cili është në planet e Hertës së Berlinit. Ndërsa, po t'u referohemi komenteve të ndryshme për dy vlonjatët e Bundesligës 2, kuptohet se ata janë sistemuar mirë në skuadrat ku luajnë, duke gëzuar edhe privilegjin e titullarit. Po si e përshkruan shtypi sportiv gjerman paraqitjen e këtyre futbollistëve shqiptarë në Bundesligë, për vitin që u mbyll?

Bundesliga
Fatmir Vata (Arminia e Bielefeldit): Një mesfushor i domosdoshëm për skuadrën e Mohlmanit. Një vit me shumë peripeci për Vatën, për shkak të dëmtimeve të shumta që ka trashëguar. Në vitin 2002 Fatmiri startoi me ndeshjen e parë, pas 9 muaj pushim, për shkak të një operacioni në ligamentin kryqëzor të gjurit të djathtë. Gjithsesi, edhe pse i dëmtuar, Vata arriti të luajë përsëri mirë dhe, tashmë, ai është një nga lojtarët ndaj të cilit bëhen më shumë faulle në Bundesligë. Në këtë këndvështrim, shtypi sportiv gjerman e konsideron shqiptarin si Rosickin te B.Dortmundit, Balakun te Bajerni i Mynihut, Basturkun te B.Leverkusen etj. Në ndeshjet e planifikuara të Arminias së Bielefeldit për vitin 2002, Fatmir Vata ka luajtur 16 ndeshje.

Vetë mesfushori kuqezi është shprehur i kënaqur për atë që ka dhënë në 2002-shin për skuadrën e tij dhe për Kombëtaren Shqiptare: "Deri diku jam i kënaqur me vetveten, por më kanë munguar dy-tre gola dhe disa përqindje të vogla në shpejtësi e në forcën kërcënuese. Për sa i përket vitit të ri, ju premtoj se do të shikoni një Vatë tjetër, ndoshta më të mirë, pranë Arminias së Bielefeldit"

Altin Lala (Hannover 96): Viti 2002 nuk ka qenë plotësisht viti i Altin Lalës. Megjithatë, ai ka qenë i padiskutueshëm për t'u përfshirë në formacionin e skuadrës debutuese të Bundesligës. Lala ka luajtur 15 ndeshje për Hanover 96 dhe ka zhvilluar lojëra të mira. Sidoqoftë, pas mbylljes së ndeshjeve të fazës së parë të këtij sezoni, Hanoveri ndihet i rrezikuar seriozisht nga mundësia e zbritjes sërish në Bundesligën 2. Skuadra e Lalës, momentalisht ndodhet në vendin e 16 të me 16 pikë, vend i cili e largon atë nga Bundesliga. Altin Lala nuk ka luajtur në fitoren e parë historike të Hanoverit në Bundesligë kundër Ëolfsburgut (3:1), për shkak të kartonit të pestë të verdhë, si dhe në ndeshjen e javës së 16-të kundër Borusias së Mynshengladbahut, pasi kishte pësuar një frakturë në hundë. Në ndeshjen e fundit të fazës së parë, luajtur kundër skuadrës së patriotit të vet, Arminias së Bielefeldit, Lala ka mbajtur shiritin e kapitenit. Kësisoj, ai është shqiptari i dytë që mban shiritin e kapitenit në një ekip të Bundesligës, pas Rudi Vatës, i cili e gëzonte këtë privilegj në kohën kur luante me Energie të Kotbusit. Përsa i përket angazhimit të këtyre dy futbollistëve me kombëtaren tonë, duhet thënë se ai ka qenë shumë pozitiv. Në dy ndeshjet kualifikuese të kuqezinjve për në Euro 2004, Vata dhe Lala kanë luajtur si titullarë.

Bundesliga 2
Ervin Skela (Eintrahti i Frankfurtit): Fillimi i sezonit ka qenë i vështirë për Skelën, pasi nuk është aktivizuar si titullar në skuadër. Përpara këtij momenti vlonjati kishte kaluar edhe disa shqetësime të tjera, si rezultat i problemeve financiare të klubit, i cili nuk ia garantonte të ardhmen mesfushorit kuqezi. Duke qenë kështu, Skela i filloi përgatitjet me një vonesë 10-ditore nga shokët e tjerë të skuadrës, gjë që ndikoi negativisht në formën e tij. Megjithatë, shumë shpejt, vlonjati u bë pjesë e planeve të trajnerit Reiman, duke e shpëtuar skuadrën me gola shumë të vlefshëm në minutat e fundit. Skela në përgjithësi ka luajtur në të gjitha ndeshjet, në të cilat jo gjithmonë është aktivizuar me kohë të plotë. Ka shënuar 3 gola në kampionat dhe 1 në ndeshjet për Kupën.

Dy golat e shënuar në minutat e fundit ndaj Duisburgut, 2:1, dhe ndaj Oberhausenit, 1:0, kanë pasur vlerë 6-pikëshe, pasi i kanë dhënë dy fitore të çmueshme skuadrës së tij. Në përfundim të fazës së parë, Eintrahti i Frankfurtit u pozicionua në vendin e dytë, me 33 pikë. Duke iu referuar aktivizimit të tij me Kombëtaren Shqiptare, viti 2002 ka qenë jo i susksesshëm për vlonjatin. Ai nuk u thirr fare nga ish-trajneri kuqezi Dosena për ndeshjet me Zvicrën dhe Rusinë.

Ervin Fakaj (Duisburg): Pasi ka kaluar momentin më të vështirë të karrierës së tij futbollistike, siç e ka pranuar edhe vetë, pasi mbeti pa ekip, Ervin Fakaj kaloi te Diusburgu. Përpara se ta hidhte këtë hap, vlonjati ishte futbollisti i parë pa skuadër, i ftuar të luajë me Kombëtaren Shqiptare. Sidoqoftë, ai ia doli të luajë edhe në Tiranë kundër zviceranëve, edhe në Vollgograd kundër rusëve, për të "fluturuar" pastaj drejt Gjermanisë, pas dy vitesh, nga ku më parë ishte larguar prej ekipit të SV Meppen (Liga e katërt). Duke qenë se kishte kaluar gjysma e parë e fazës së parë të Bundesligës 2, Fakajt i ka takuar të luajë tri ndeshje të pëlqyera për Duisburgun. Kjo skuadër, që pas ardhjes së Fakajt, ka arritur të marrë 5 fitore të njëpasnjëshme. Kësisoj, Diusburgu ndodhet në vendin e 7 të me 27 pikë.

Itali
Tare, Xhunti dhe Srniçek, janë "xhevahirët" në shitje të klubit lombard.

Tare: Dua të qëndroj te Breshia
Shtypi lokal breshian shkruante dje për lëvizjet e mundshme të klubit lombard në merkaton e dimrit. Midis të tjerash, gazeta "Bresciaoggi" citonte në një artikull të saj se drejtuesit e "Breshias" kanë nevojë të shesin lojtarë për të mbushur arkën e klubit, e cila nuk i përballon dot rrogat aktuale të disa futbollistëve. Mes emrave të këtyre të fundit është edhe sulmuesi i kombëtares sonë, Igli Tare, Xhunti dhe Srniçek, të konsideruar nga gazeta në fjalë si futbollistë të shitshëm, kundrejt ofertave joshëse financiare që mund të adresohen për ta. Në fakt, presidenti Korioni nuk po nxitohet për të ardhmen e këtyre futbollistëve, por mësohet të ketë pohuar se nuk duhet nxituar në blerjet e reja, pasi ato, kur kryhen flakë për flakë, mund të jenë të dështuara. Me këtë deklarim të tij numri 1 i "dallëndyshkave" ka lënë të kuptojë se, pa mbërritur ndonjë ofertë e majme për këta tre futbollistë, nuk ka ndërmend të programojë përforcime të reja.

Nga ana tjetër, vetë futbollistët që e shohin veten në ankand, mes të cilëve figuron edhe emri i biondit tonë kuqezi, Tare, presin me ankth të takohen me presidentin e skuadrës. Igli Tare, në një intervistë për gazetën "Bresciaoggi" deklaronte: "Do të flas sa më shpejt të jetë e mundur me presidentit e skuadrës, Korioni. Nuk kam shumë për t'i thënë. Ndihem shumë mirë te Breshia dhe dua të qëndroj te kjo skuadër, por nuk dëshiroj absolutisht të përsëritet edhe një herë, ndoshta pas dy ose tre muajsh, ajo që ndodhi me mua këtë verë. Më duket se presidenti Korioni ka deklaruar se, nëse vjen ndonjë ofertë e rëndësishme për mua, do ta marrë në konsideratë. Jam kurioz të zbuloj se çfarë më rezervon ky vit i ri. Unë shpresoj të luaj sërish te Breshia. Nuk po bëj asgjë për të ndërruar skuadër. Është krejtësisht e kundërta dhe jo vetëm se kam edhe dy vjet të tjera kontratë. Jam mirë këtu ku jam. Jam i bindur se kam bërë gjithmonë detyrën time. Nuk kam asgjë për të kërkuar. Vetëm respekt, të cilin mendoj se e kam merituar".

Rexhina: Bogdanin në këmbim të Luizos së Ankonës
Skuadra e Rexhinës kërkon ta këmbejë sulmuesin e saj shqiptar, Erion Bogdanin, me sulmuesin e Ankonës, Paskuale Luizon. Një fakt të tillë e bën të ditur gazeta italiane sportive "La Gazzetta dello Sport", e cila shkruan se 25-vjeçari shqiptar i Rexhinës mund t'ia lërë vendin sulmuesit të skuadrës së Serisë B, Ankonës. Kësisoj, ridalin në skenë problemet për shtatlartin tonë kuqezi, i cili nuk e ndien veten të sigurt të skuadra kalabreze. Momentalisht, Bogdani vazhdon fazën e riaftësimit, pas dëmtimit të muajit nëntor, i cili e detyroi t'i nënshtrohet një operacioni dhe të qëndrojë rreth 5 muaj larg fushave të futbollit. "Kërkesa e klubit të Rexhinës ka mbërritur në klubin e Ankonës dhe tani pritet të diskutohet në nivel presidentësh për të marrë gjithçka formë zyrtare",- shkruante gazeta në fjalë.