Në shkollën e mesme "Sen Meri & Vinsent" Xhejms kishte arritur gjatësi prej 183 centimetra, i gatshëm për t'i realizuar ëndrrat. Në stërvitjen e parë trajneri e kishte pyetur çka dinte të luante më mirë, ndërsa LeBron duke qeshur i ishte përgjigjur: Mund të luaj çkado që të paramendoni, do t'ua plotësoj të gjitha ëndrrat tuaja

"Mrekullia nga Akrona", "Fenomeni", "Senzacioni", "Pasardhësi i Majkëll Xhordanit", "Përsëri sundon 23" këto janë vetëm një pjesë e epiteteve të ëmbla me të cilat emërohet LeBron Xhejms nga momenti kur paralajmëroi se do të tejkalojë "Universitetin dhe drejtpërdrejt nga shkolla e mesme 'Sen Meri & Vinsent' të hapërojë në karavanin e NBA-së". Amerika me ditë të tëra fliste për 18-vjeçarin e ri të talentuar, i cili shuton mrekullueshëm, kërcen, asiston, gozhdon, di dhe mundet gjithçka ndër harkun e koshit. Në gojën e gjithë basketbollistëve para se të bëhej drafti (tërheqja) pëshpëriteshin fjalët se cili ekip do të ketë fatin që si dhuratë të merr LeBronin. "Topi i artë" me numër 1 u takoi njerëzve të Klivlendit.

-Në heshtje dëshiroja që të ndodhë një gjë e tillë. Askund nuk është më mirë se në shtëpi. Dëshiroj që të mbes në Ohajo, mendoj se kështu mendojnë edhe "kavalirsat" – ka thënë LeBroni i ri verën e kaluar.

Klivlend në pesë-gjashtë vitet e fundit ishte gjithmonë në mesin e gjashtë ekipeve më të dobëta në NBA, me dy duar e pranoi dhuratën nga qielli. Nuk u shkoi ndër mend njerëzve nga klubi që të përsërisin "budallakinë" e Portlandit para dy dekadave, kur e lëshuan mundësinë që në Oregon të sjellin Majkëll Xhordanin. Kështu që qartë i bënë me dije komisarit të NBA-së, Dejvid Shtern:
- E duam LeBron Xhejmsin!
- Jam i gatshëm dhe mezi pres që të fillojë sezoni – shkurt ka thënë Xhejms, duke mos fshehur emocionet.

Pas ulëses së LeBron Xhejmsit në "Medison" nëna Gloria qante. Më në fund ajo u qetësua. Ishin këto lotët e gëzimit. Vetëm ajo e di se si kishte kaluar gjatë kësaj faze dhe prej se kishte hequr dorë për suksesin dhe gëzimin e LeBronit.

-LeBron është djalosh i artë. Kishte një fëmijëri të vështirë, një kohë të gjatë kemi jetuar nga ndihmat sociale, mirëpo gjatë gjithë këtyre viteve jam munduar që mos ta hetojë skamjen, që asnjëherë të mos turpërohet prej shokëve pse nuk ka atlete të reja, xhaketë apo pantallona. E kam ndarë nga kafshata e gojës, pasi që djali im këtë e ka merituar.

Në paralagjen e Klivlendit, Akron, LeBron ka lindur në ditët e fundit të vitit 1984. Topi ishte lodra më e adhuruar e tij, ndërsa Majkëll Xhordani ishte idhulli i tij i parë. Edhe pse shpesh herë ata shpërnguleshin (më shumë se 30 herë), në secilën dhomë të tij, muret ishin të mbuluara me postere të basketbollistit më të mirë të shekullit të 20-të.

-Gjithmonë krenohesha me të, me sy të hapur dhe shpesh herë ngelja edhe pa frymë kur e shikoja se si luan dhe se si fiton trofe të ndryshëm.

Nuk kam pasur guximin asnjëherë që ndokujt t'i them se ndonjë ditë do të dëshiroja të bëhem si ai, apo unë do të luaj si Majklli.

E kishte të qartë se vetëm me punë fantastike mund të arrijë të realizojë ëndrrat dhe të afrohet deri tek i përkryeri, pardon, Xhordani. Ndonjëherë LeBron dinte edhe ta teprojë. Kur kishte 14 vjet me të madhe gozhdonte, ndërsa pas disa muajve pothuajse "theu qafën", pasi që kishte thyer harkun dhe ishte rrëzuar në tokë! Ishte koha për gjëra të vërteta.

Në shkollën e mesme "Sen Meri & Vinsent" Xhejms kishte arritur gjatësi prej 183 centimetra, i gatshëm për t'i realizuar ëndrrat. Në stërvitjen e parë trajneri e kishte pyetur se çka do të dinte të luante më mirë, ndërsa LeBron duke qeshur i ishte përgjigjur:

-Mund të luaj çkado që të paramendoni, do t'ua plotësoj të gjitha ëndrrat tuaja. Para së gjithash, do të mundim secilin ekip që do të na dalë përballë!

LeBron e plotësoi premtimin e dhënë. Luante në të gjitha pozicionet, për të cilën gjë flasin vetë shifrat impresionuese të sezonit të parë: 18 pikë, shtatë kërcime, katër asistime dhe tre topa të vjedhur për vetëm një ndeshje. Shkolla nga Ohajo, e udhëhequr nga Xhejms, arrin që të shkatërrojë gjithçka para vetes, arrin të shpallet kampion shtetëror. Vetëm për te "Sent Meri&Vinsent" luan në një sallë që arrin të grumbullojë 20 mijë shikues, televizioni nacional pas tri dekadave emeton ndeshje të ekipeve të shkollave të mesme. Të gjithë flisnin për djaloshin nga Akroni, e lavdëronin dhe e ngrinin në yll. Mirëpo, më së shumti iu gëzua një telefonate:

-Telefoni celular më cingëronte pandërprerë, të gjithë dëshironin të më thoshin diçka. Nuk isha i disponuar që gjithmonë të flisja me ta, mirëpo në mënyrë instiktive iu përgjigja kësaj thirrje. O njeri, më kërkoi Majkëll Xhordani. Më ftoi që t'i bashkangjitem në kampin e tij stërvitës, ku përgatitej për sezonin e tij në Uashington. Mezi mora frymë dhe disi arrita që t'i them se me siguri do të jem atje.

Pas stërvitjes së parë të përbashkët, Majkëll i kishte thënë LeBronit që menjëherë të paraqitet në draft, pasi që nuk ka arsye se pse të pret më gjatë. Pasardhësi i fronit me vëmendje dëgjoi mbretin.

-Shikoja në Xhordanin sikurse në Zot, do të bëja gjithçka që të më thoshte ai. U kuptuam se nuk ka kuptim që kundër moshatarëve të mi të shënoj nga 30 pikë, që të gozhdoj nga 10 herë në secilin takim.

Definitivisht vendosa që menjëherë të shkoj në NBA. Po, Majkëll më dha numrin e telefonit, më premtoi se për mua gjithmonë do të jetë i hapur. Edhe sot e kësaj dite numri i tij është i pari në adresarin tim!

Në Klivlend, LeBron Xhejmsin e kanë pritur sikurse një shpëtimtar, lojtari i cili do të kthente shikuesit në sallën e "Grand Arenës", të sjell fitore dhe të hap rrugën drejt plej-ofit. Vështirësi më të madhe kishte trajneri Poll Sajlls. Me net të tëra nuk kishte fjetur, duke menduar se cilin rol t'ia ndante Xhejmsit.

-LeBron sipas shkathtësive fizike të përkujton Xhordanin, mirëpo, që është më e rëndësishme, mendon në lojë sikurse Mexhiku. Nuk është vetjak, bën që bashkëlojtarët të ndjehen më mirë, po të mos jetë kështu, ai në secilën ndeshje do të shënojë tripëll-danëll. E dija këtë që nga dita e parë, kemi fituar një diamant. Zoti na e dërgoi Xhejmsin.

Presioni i shumtë si nga mediat dhe njerëzit e ndryshëm, si dhe popullariteti i madh nuk bënë që LeBron të humbet.

Përkundrazi. Që nga ndeshja e parë në NBA kundër Sakramentos (25 pikë, nëntë asistime, gjashtë kërcime), deri në ndeshjen e fundit ndaj Atlantës (34 pikë, shtatë asistime, gjashtë kërcime), në mënyrë fenomenale po i bart "Kavsat" në kraharor, të cilët ende nuk janë forcuar sa duhet. Ekipi është në rrugë të mbarë që të sigurojë pikë dy herë më shumë nga sezoni i kaluar dhe të sigurojë kualifikim në ndeshjet eliminuese.

-Definitivisht ekipi ka një ardhmëri të mirë dhe kjo është shumë e rëndësishme. Nuk më intereson që të shënojë 50 pikë dhe të gjithë të flasin për mua, dëshiroj titull, pasi që kjo është mënyra e vetme që t'ju respektojnë dhe t'ju mbajnë në mend – është i qartë LeBron, i cili ka vetëm 19 vjet.

Me ardhjen e LeBronit në NBA, kanë rënë në ujë të gjitha parashikimet për ardhmërinë e zymtë të Ligës më të mirë në planetin tonë, që e ndoqi nga ikja e Majkëll Xhordanit. Edhe pse një gjë e tillë dukej reale, pasardhësi prapëseprapë u paraqit. Nëse mund të gjykohet nga sezoni debutues, askush nuk do të befasohet nëse Bron e tejkalon Majkllin.

-I plotfuqishmi i kishte dhuruar gjithçka Xhordanit. Të njëjtin talent i ka dhënë edhe Xhejmsit. Ende është shumë herët që të krahasohet më i madhi dhe fillestari. Mirëpo, nëse ndokush i merr kurorën Xhordanit, ai do të jetë LeBron.

Ai ose askush – parashikon trajneri Sajlls.