Kuqezinjtë kanë realizuar ëndrrën e 16 mijë tifozëve në “Loro Boriçi”, duke u hakmarrë për humbjen e Vollgogradit.

Shqipëria “shkel me këmbë” Rusinë
Kombëtarja e gjermanit Brigel ka fituar me meritë ndaj pretendentit kryesor në grupin tonë.

Kombëtarja shqiptare ka “shkelur me këmbë” dje njërën nga skuadrat më të njohura të Evropës, Rusinë, gjatë një ndeshjeje historike të zhvilluar në stadiumin “Loro Boriçi” të qytetit të Shkodrës. Para fillimit të takimit, dukej pothuajse utopike që Shqipëria të fitonte me një rezultat të tillë ndaj skuadrës Ruse, e cila vinte pas dy fitoreve 4-2 dhe 4-1 me Irlandën në Moskë dhe Shqipërinë në Vollgograd.

Trajneri Gazajev i Rusisë shprehej mjaft optimist para takimit për një fitore në Shkodër, ndërkohë që Hans Peter Brigel nuk donte të dilte pa gjë nga debutimi i tij i parë me kombëtaren shqiptare. Në fund fitorja i ka buzëqeshur gjermanit Brigel dhe miliona shqiptarëve që kanë festuar dje në të gjithë trojet etnike dhe në diasporë. Shqipëria ka përsëritur pas afro 19 vjetësh (fitorja 2-0 me Belgjikën) një fitore historike ndaj një kundërshtari shumë të njohur në arenën ndërkombëtare. Ndërsa gjyqtari belg i ka rënë bilbilit për të fundit herë, rusët nuk kanë dashur të besojnë se janë thyer keqas në djepin e futbollit shqiptar, në Shkodër.

Takimi ka nisur i qetë, dhe pa ngacmime në portat respektive, pavarësisht se rusët ishin më qartë në lojën e tyre dhe kombëtarja jonë dukej se po haste mjaft vështirësi në organizimin e lojës. Pas minutës së ’15 rusët janë shfaqur frikshëm në dy momente përpara portës sonë, por duket se një gjë e tillë ka ndikuar që loja e kuqezinjve të merrte flakë. Spostimet e Hasit në ndihmë të mbrojtjes i kanë mbyllur shtigjet për lojtarët e Gazejev, i cili ka mbetur i befasuar kur gjyqtari belg ka akorduar një 11 metërsh në favor të tanëve pas një prekje të topit me dorë në zonën e portierit nga mbrojtësit miq. Stadiumi “Loro Boriçi” është çuar në këmbë për të pritur golin e parë të tanëve, por ish-benjamini i këtij qyteti, Klodian Duro, ka gjuajtur dobët nga pika e bardhë dhe portieri rus Ovçinjikov ka bërë detyrën duke e grushtuar topin.

Pikërisht në këtë moment kur u duk se shqiptarët humbën një rast të papërsëritshëm, Skela, pasi ka marrë një top të kalibruar nga Murati, ka shmangur një nga mbrojtësit miq në hyrje të zonës së rreptësisë duke goditur drejt portës. Topi i grushtuar nga portieri rus ka përfunduar në këmbët e Rrakllit, që nga një pozicion i vështirë ka shënuar me një gjuajtje të zgjuar. Veterani i kombëtares nuk e ka lënë t’i ikë nga dora rasti i një rikthimi kaq të lavdishëm në kombëtare. “Loro Boriçi” është ndezur flakë dhe shqiptarët kanë filluar të besojnë se mund ta vënë përfund “ariun” rus. Gazejev është alarmuar dhe e ka zhvendosur përpara skuadrën e tij, por pjesa e parë do të mbyllej me avantazhin e tanëve. Qysh me fillimin e pjesës së dytë Gazejev e ka hedhur në sulm skuadrën e tij, e cila do të kishte mjaft telashe nëse thyhej në Shkodër.

Rusët pas pushimit janë shumë më të shpejtë dhe nisin të shkelin çdo sektor të fushës duke bërë presing për të kapur në çdo moment topin. Brigel e ka kuptuar darën e Gazejev, por shpreson që të tijtë të qëndrojnë megjithëse porta e Strakoshës shpëton disa herë nga goli. Por ngulmimi rus do të jepte rezultat në minutën e ‘77 kur Karjaka do t’i shpëtonte mbulimit të mbrojtjes brënda zonës dhe do të shënonte golin e barazimit. Rusët janë gëzuar, ndërkohë që Gazejev ka kërkuar shënimin e golit të fitores. Por pikërisht kur pritej që ndodhte ajo që ndodh zakonisht me skuadrën shqiptare, që pas pësimit të golit të parë nis shpërbërja, dje ndodhi e kundërta. Lala ka marrë një top nga Myrtaj në krahun e djathtë të sulmit tonë dhe është lëshuar drejt portës kundërshtare. Pasi ka shmangur dy mbrojtës miq ai ka dalë përballë portierit të Lokomotivës së Moskës Ovçinjikov duke shënuar golin e dytë.

Ka ende dhe 10 minuta lojë dhe “Loro Boriçi” është në delir, fitorja nuk është veçse një hap larg. Rusët e humbasin kontrollin dhe hidhen të gjithë në sulm për të gjetur golin e barazimit. Por pikërisht tre minuta më vonë do të marrin goditjen vdekjeprurëse. Myrtaj vërshon në krahun e majtë të sulmit tonë dhe harkon një top të përkryer që gjen kokën e Tares. Bjondi shqiptar e nis topin drejt portës mike, por Ovçinjikovi ia pret rrugën duke mos e zotëruar. Tare që ka ndjekur aksionin e ka shtyrë topin dhe një herë me këmbë drejt rrjetës, duke i dhënë fund ndeshjes. Më tej s’ka më histori. Është e vërtetë, Shqipëria 3 dhe Rusia 1.

Shënues:
Shqipëria - Altin Rraklli 20, Altin Lala 80, Igli Tare 83
Rusia –Andrei Karjaka 77
Shikues: 16,000

Ekipet:
Shqipëria: 1-Foto Strakosha, 2-Geri Cipi, 3-Elvin Beqiri, 4-Ardian Aliaj, 5-Altin Lala, 6-Klodian Duro, 7-Ervin Skela (84, Nevil Dede), 8-Besnik Hasi, 9-Edvin Murati (68, Arian Bellai), 17-Igli Tare, 10-Altin Rraklli (71, Florian Myrtaj).

Russia: 1-Sergei Ovchinnikov, 2-Gennady Nizhegorodov, 3-Sergei Ignashevic, 4-Alexei Smertin (73, Igor Yanovsky), 5-Sergei Semak (50, Andrei Solomatin), 6-Alexander Berezutsky, 7-Evgeni Aldonine, 8-Rolan Gusev (55, Andrei Karayka), 9-Alexander Tochilin, 10-Dmitry Loskov, 11-Alexander Kerzhakov.
Gjyqtar: Paul Alaerts (Belgjika)

Shpresat
Ndeshjet e zhvilluara
Shqipëri – Zvicër 0 : 0
Rusi – Irlandë 2 : 0
Zvicër – Gjeorgji 2 : 0
Gjeorgji – Rusi 0 : 3
Irlandë - Zvicër 2 : 3
Rusi – Shqipëri 1 : 0
Datë 29 mars 2003
Shqipëri – Rusi
Gjeorgji – Irlandë

Renditja
1. Rusia 9 pikë
2. Zvicra 7 pikë
3. Shqipëri 1 pikë
4. Irlanda 0 pikë
5. Gjeorgjia 0 pikë

Gjyqtarët nga Belgjika
Kryesor : Alaerc Pool
Asistentë : Henisen Rumbont
Deni Vaderhoven
I katërt : Erik Otero

Grupi 10
Ndeshjet e zhvilluara
Zvicra 7 pikë
Russia 6 pikë
Shqipëria 4 pikë
Irlanda 3 pikë
Gjeorgjia 0 pikë
Ndeshjet e zhvilluara
Rusi - Irlandë 4 - 2
Svicër - Gjeorgji 4 - 1
Shqipëri – Zvicër 1 - 1
Gjeorgji - Rusi (E shtyrë)
Irlanda – Zvicra 1 - 2
Rusi - Shqipëri 4 – 1
Gjeorgji – Irlandë 1 - 2
Shqipëri - Rusi 3 - 1
Datë 2 prill 2003
Shqipëri – Irlandë
Gjeorgji – Zvicër

Protagonistët
Foto Strakosha
Kapiteni i kombëtares ka festuar 38 vjetorin e lindjes së tij me fitoren e shkëlqyer të arritur ndaj Rusisë. Ai ka qenë vendimtar sidomos në daljet nga porta. Karjaka s’i la mundësi për veprim në çastin e golit.
Geri Çipi
Ka treguar edhe një herë që mbetet shtylla e mbrojtjes së kombëtares. Pothuajse nuk ka gabuar në asnjë moment duke koordinuar veprimet me dy kolegët e tjerë Beqiri e Aliaj, që debutonin në kombëtare.
Elvin Beqiri
Padyshim zbulimi më mbresëlënës i trajnerit Brigel. Gjermani pati kurajon që të rrezikojë me të në ndjeshjen me kundërshtarin më të fortë dhe shkodrani ia shpërbleu në mënyrën më të mirë.
Ardian Aliaj
Një tjetër zbulim i gjermanit Brigel. Aliaj pavarësisht se ka vite që luan në kampionatin belg ai debutoi për herë të parë në kombëtare dhe një detyrë të tillë ai e përmbushi me sukses së plotë.
Altin Lala
Mesfushori tashmë i shquar i kombëtares tregoi dhe në “Loro Boriçi” formën e tij të shkëlqyer që po paraqet dhe në kampionatin gjerman. Shpirti i sakrificës dhe kurajo e tij çoi në shënimin e golit të dytë.
Klodian Duro
Elbasanasi tregoi nivel në lojën e tij, dhe gjeti kurajo të suportonte gabimin që bëri në humbjen e 11-metërshit, pavarësisht se humbja e këtij rasti mund të rezultonte fatal në fund të ndeshjes.
Ervin Skela
Për herë të parë titullar në kombëtare qysh nga fillimi i takimit. Ndihmoi së tepërmi me lojën e tij në sektorin e mesfushës dhe ka meritë të padiskutueshme në shënimin e golit të parë.
Besnik Hasi
Gjakovari ka qenë i vetmi përfaqësues i Kosovës në fushën e lojës, pavarësisht se Dragusha dhe Beqaj ndodheshin të ulur në stol. Tregoi qëndrueshmëri në lojë dhe i shërbeu taktikisht trajnerit.
Edvin Murati
Murati ka luajtur dje në kushtet e një dëmtimi tepër shqetësues. Brigel ka besuar tek Murati dhe ai ia ka dalë mbanë lojës së kundërshtarit deri në momentin që u largua nga fusha mes duartrokitjesh.
Igli Tare
Tare ka paraqitur në fushën e “Loro Boriçit” formën e mirë që është duke demonstruar në kampionatin italian. Goli i tij i tretë ishte goditja fatale për skuadrën ruse duke çimentuar fitoren e kombëtares sonë
Altin Rraklli
Kavajasi u kthye në kombëtare pas një mungese të gjatë dhe në momentin që dukej sikur ishte larguar përfundimisht nga kuqezinjtë. Sigurisht nuk ka kthim më të mirë sesa shënimi i një goli me Rusinë.

Ndërrimet
Myrtaj ka ndikuar mjaft në lojën e sulmit gjatë kohës që u aktivizua duke marrë pjesë në aksionin e golit të dytë dhe të tretë. I shërbyen skuadrës për aq sa u aktivizuan dhe Nevil Dede e Arian Bellai.