Këngëtarja Soni, rritja e saj artistike, preferencat, rivaliteti, bindjet e saj politike, jeta artistike madje edhe pjesë nga jeta personale janë në intervistën e saj.

Një këngë dedikuar dashurisë së ikur larg e solli Soni Malaj më pranë publikut, duke shënuar një tjetër arritje në karrierën e saj muzikore. Albumi i fundit, i hedhur në treg gushtin e kaluar, do ta forconte edhe më shumë potencialin e saj artistik. Të prekësh qiellin e shtatë, për Sonin është një ndjesi reale që e përjeton çdo moment në jetën e saj. Ish pjesëtarja e grupit “Spirit Voice”, e diplomuar në fakultetin e gjuhëve të huaja, dega frëngjisht, është vlerësuar disa herë me çmime të rëndësishme në festivale, jo vetëm në Shqipëri, por edhe Kosovë e Maqedoni. Bashkëpunimi me Sinan Hoxhën në këngën “Shukarie”nuk kaloi pa u komentuar e paragjykuar, por për Sonin, ky bashkëpunim shtoi fansat e saj, kësaj radhe ato të muzikës popullore. Një gjetje jo e rastësishme e marrë nga folklori i veriut e pikërisht Tropojës, origjina e Sonit. Ditët me diell në jetën private e kanë frymëzuar që t`i përkushtohet akoma më shumë muzikës dhe koncerteve të njëpasnjëshme në Evropë dhe Amerikë. Sonin e takova në teatrin e Operas dhe Baletit, në Tiranë, në provat e “Musical Show Chicago”, që do të vihet në skenë, në fund të kësaj jave.

Kjo është edhe eksperienca me e fundit e këngëtares duke i shtuar CV-së edhe një tjetër eksperiencë me vlerë. Intervistat e Sonit në media kanë qenë të pakta kohët e fundit, por ajo kurrsesi nuk nguron të flasë dhe të zbulojë një pjesë të emocioneve pas hedhjes në treg të këngës më të transmetuar dhe të pëlqyer në mbarë trevat shqiptare; “Të dua ty”.

Duket se albumi juaj i fundit po bën shumë emër. Na thuaj diçka më shumë rreth tij.
Albumi u hodh në treg në gusht 2006 dhe erdhi menjëherë pas albumit "E vogla". Këngët e këtij albumi u konsumuan shumë shpejt me pjesëmarrje në festivale dhe koncerte, kështu që lindi nevoja për të pasur diçka të re në treg. Punova shumë për albumin, "Mesdhe" në mënyrë që të gjitha këngët të jenë hite në vetvete. Janë të gjitha këngë të bukura dhe nuk duhet të mbeten në hije. Do t`i jap secilës këngë kohën e vet.

Nga albumi i parë në 2001 deri tek i fundit, vihet re profesionalizmi në rritje. Në kohën kur u publikua albumi i parë isha vetëm 19 vjeç. Sot jam 25 vjeç. Na zbulove edhe moshën pa dashur. (qesh) Për t’ju rikthyer pyetjes së mëparshme, gjatë viteve në skenë, unë kam studiuar çfarë kërkon tregu, çfarë jam unë në gjendje të përcjell, kapacitetin tim si artiste.

Kënga juaj më e fundit "Të dua ty" është një ndër hitet e momentit në Shqipëri. Cila është e veçanta e kësaj kënge?
Prej kohësh, unë punoj me të njëjtin staf, qofshin këto kompozitorë, orkestrantë, regjisorë apo stilistë dhe sa më shpesh punojmë bashkë, aq më shumë ata i njohin aftësitë e mia vokale. Kësisoj, ata janë këshilltarët e mi më të mirë. Ata e dinë se çfarë kërkojnë njerëzit nga Soni dhe çfarë mund të eksperimentojmë. Ky është në një farë mënyre çelësi i suksesit tim.

Pse keni vendosur të bashkëpunoni me regjisorë maqedonas e jo shqiptarë? Unë nuk e kam parë në aspektin e kombësisë. Ndihem mirë me ta dhe deri tani nuk kanë dështuar në asnjë projekt që kanë marrë përsipër. Për aq kohë sa ata të jenë produktivë në punën time, do të vazhdoj të punoj me ta.

Më thuaj disa nga prapaskenat e xhirimeve të vidioklipit, "Të dua ty". Ky ka qenë videoklipi që më ka lodhur më shumë dhe regjisori më kishte paralajmëruar që të pushoja. Kërkohej që unë të aktroja. Mbaj mend që atë ditë vetëm qeshja. Një këngë melankolike, që kërkonte një pamje krejt tjetër dhe në momentin kur unë dilja në dritare për t`i kënduar dashurisë time, shikoja njerëz në shtëpitë e tyre duke darkuar, apo dukë larë enët e të tjerë që më shihnin.

Ishte shumë për të qeshur. Ishte një shpërqendrim që vinte nga faktorë të jashtëm. E kisha të vështirë të shtiresha sikur askush tjetër nuk ekzistonte.

Ke kënduar edhe muzikën popullore në bashkëpunimin me Sinan Hoxhën por edhe kolazhet me këngëtarë nga Kosova. Nuk mjaftonin admiruesit e këngës së lehtë?
Unë kam kënduar edhe këngë popullore, përgjithësisht ato të trevave të veriut. Unë jam tropojane dhe jam rritur me atë lloj muzike ritmike. Më pëlqen ritmi i veriut. Pak kohë më parë, Fatmira Breçani e cila më ka mësuar disa këngë të trevave të veriut, më thotë me shaka se po bëja sukses me idetë e saj, kur isha e vogël. (qesh).

Kush e hodhi idenë e bashkëpunimit, ti apo Sinani?
Lindi nga të dy. Për më tepër, ajo që më dha më shumë kënaqësi është sepse arrita ta njihja Sinanin më tej. Tashmë jemi miq shumë të mirë.

U shfaqët po ashtu në një kolazh me Adelinën, Gentën, Zanfinën, Big Mama dhe Ermal Fejzullahun. Si e komenton këtë bashkëpunim? Nuk i quaj fare bashkëpunim, ishte thjeshtë një kolazh për Vitin e Ri është një eksperiencë që nuk do ta përsëris më.

Nuk të pritën mirë në Prishtinë?
Më pritën shumë mirë, por nuk dola e kënaqur nga vetja ime. Kur e kam parë, nuk më ka pëlqyer aspak. Po ashtu edhe familja dhe njerëzit e mi më të ngushtë nuk e pëlqyen. Unë nuk mund të rri 18 minuta në skenë, kur 12 minuta ishin vallëzim. Nuk më pëlqen kjo gjë.

I sheh si rivalë më të fortë këngëtarët shqiptarë të Kosovës?
Edhe ato janë rivalë padyshim, por këtu në Shqipëri ka më shumë rivalitet dhe kjo është një anë pozitive që më bën të eci akoma më përpara. Unë rivale konsideroj një këngëtare shumë të mirë, që ka shumë simpatizantë dhe kur këndon drejtpërsëdrejti përcjell po aq emocion sa edhe në këngët e regjistruara në CD.

U komentua shumë lidhja juaj me Florian Mumajezin edhe pse ju nuk kishit dëshirë ta deklaronit publikisht. Përse një qëndrim i tillë? Asnjëherë nuk kam pasur dëshirë të flas për jetën time private. Është e vetmja gjë, që dëshiroj të mbetet private, por një bisedë intime me një gazetare, u përdor nga e saj dhe u publikua pa dijeninë time. Mund të them që ndihem e plotësuar dhe shumë e lumtur në jetën time private.

Thuhet se keni bërë operacione plastike. Nga 1 në 100%, sa origjinale është Soni?
Do të thosha 200%. Nuk kam bërë asnjë ndërhyrje kirurgjikale. Kisha dëshirë të bëja operacion hundën, por mamaja ime është kategorikisht kundër. Në fakt jam e vendosur për këtë. Ndoshta kur të kem kohë do ta realizoj këtë operacion në hundë.

Në Shqipëri ke preferuar të marrësh pjesë në koncerte të fushatave elektorale të partive. Ka të bëjë kjo me bindjet tua politike? Sinqerisht në të tilla raste, kam zgjedhur ata që paguajnë më tepër. Nuk ka lidhje me bindjen time partiake. Në fund të fundit, ata shfrytëzonin imazhin tim, ndërsa unë anën e tyre materiale.

Impenjimi më i fundit i juaji është pjesëmarrja në "Musical Show Chicago"? Po. "Chicago" do të vihet në skenë më 24 prill, ku unë luaj rolin e Velmës. Do të jetë eksperiencë e re për mua. Do të këndoj drejtpërsëdrejti, do kërcej shumë dhe do të transformohem në një këngëtare kabareje të viteve 40 e cila kryen një vrasje.

Jam në prova intensive për këtë spektakël dhe them se duhet të mbetet surprizë duke ftuar të gjithë publikun që do ta ndjekë.

Çfarë mendon se nuk shkon në Shqipëri?
Asgjë nuk shkon. Gjithçka është kokëposhtë dhe gjithçka duhet të fillojë të ndryshojë duke filluar nga politikanët e deri tek koncepti i njerëzve. Nuk duhet të harxhojnë aq shumë kohë në kafene, por të punojnë për të arritur diçka të tillë.

Zhgënjimi më i madh i jetës?
Janë shumë. Nuk i numëroj dot (qesh). Do të theksoja zhgënjimet që kam kaluar nga njerëzit, përzgjedhja që u kam bërë atyre. Padyshim edhe në karrierë kam pasur plot momente zhgënjimi.

Soni dhe Londra. Çfarë kujtimesh ruan nga vizita në kryeqytetin britanik?
Impakti i parë ka qenë i mrekullueshëm. Mua më pëlqen stili i ndërtesave londineze, duke ruajtur arkitekturën e viteve të kaluara e të ndërthurur me modernen. Londrën mund ta quaj një qytet amerikano-evropian. Por më befasoi fakti se ishte një qytet jashtëzakonisht i shtrenjtë.

Kujt i adresohet suksesi i arritur?
Së pari Zotit që më ka dhënë talentin dhe fuqinë për të punuar dhe dy prindërit e mi të mrekullueshëm. Ata më kanë qëndruar pranë dhe me kanë inkurajuar në çdo iniciativë timen. Padyshim edhe miqve të mi.

Si e imagjinon veten në moshën 40-vjeçare?
Nuk e kam imagjinuar fare, pasi kam frikë nga 4-tra dhe 0-ja. (qesh). Them se do jem një grua e qetë familjare, që del në ekran herë pas here duke kënduar, me tre fëmijë, dy djem dhe një vajzë, (qesh) Kaq!

Ndonjë mesazh për shqiptarët e Britanisë?
Së pari i falënderoj që e lexuan këtë intervistë. Ndihem mjaft mirë kur më vlerësojnë dhe një fjalë e mirë e publikut vlen më shumë se çdo çmim që mund të fitosh. E mira do të ishte që artistin ta shohin në skenë për çfarë ai përcjell. Faleminderit shumë për mbështetjen që më keni dhënë dhe më jepni.

Klikoni ketu per te degjuar disa kenge hite te saj.

Ervis Maja