Në emrin e saj duket se ka një trill heroizmi, paepësie që natyrisht do ta njohësh nëse arrin ta dëgjosh kur këndon në skenë. Një baladë që buron nga fëmijëria e saj dhe pa dyshim nga talenti që ngjiz çdo njeri në shpërthimet që ai ka në jetë. Fati e lidhi me një muzikant dhe të dy si shokë të pandarë iu futën rrëpirës së vështirë të muzikës për të arritur drejt majave shkëlqyese të interpretimit. Me një elegancë të lindur dhe koherencë gati binjake me bashkëshortin e saj, Babeta të ngjall respekt dhe njëkohësisht admirim.

Një bashkëjetesë mes muzikës dhe dashurisë që gati të miklon me habi dhe pse jo me pak zili. Ndërsa e takoj vë re që Iliri (bashkëshorti i Babetës) mban në qafë një medaljon ku është vizatuar një grua dhe një fëmijë; është Babeta dhe vajza e tyre. Babeta ndjehet me fat dhe nuk ka se si të mos jetë e tillë.

Dashuria juaj vazhdon të djegë si vitet e para?
Është një realitet që ne e jetojmë çdo çast, si nevojë dhe si kënaqësi.

Një prej videoklipeve që ju keni realizuar quhet “Mëkat”. Ndonjë eksperiencë personale?
As që bëhet fjalë. Është një tekst abstrakt, i krijuar nga Turi i “Produkt 28” i cili thotë se mëkati sot nuk ka të bëjë me “mollën” por me telefonin celular.

Ju ka ndihmuar apo penguar jeta bashkëshortore në profesionin e këngëtares? Bota muzikore është shumë e egër dhe ka një konkurrencë të ashpër. Të ndihmojnë më shumë kur je beqare, një vajzë e bukur që kërkon mbrojtje dhe mbështetje. Kur gjithkund paraqitesh me një burrë përkrahu, disa porta dhe të mbyllen surratit. Nuk di pse kohët e fundit e kam ndjerë më shumë se më parë.

Kjo të krijon probleme sepse ne këngëtaret presim që të vlerësohemi për zërin dhe interpretimin që bëjmë, ndërkohë që i jepet më shumë rëndësi pamjes së jashtme dhe lidhjeve të interesave. Kjo të acaron pak, por fundi i fundit kështu ndodh në çdo fushë të artit.

A të ndodh shpesh të bëhesh nervoze?
Nuk di ta përcaktoj saktësisht. Jam natyrë e ndjeshme dhe mund të bëhem nevrike kot, për gjëra që ndoshta nuk kanë rëndësi shumë të madhe.

Por sigurisht që nuk qahemi se jeta shqiptare nuk është hiç kurnace për të sjellë nerva.

Sa ndryshon Babeta në jetën reale dhe në skenë?
Ka pak diferencë, sepse normalisht skena ka tjetër veshje, tjetër model. Po mua nuk më pëlqejnë ndryshimet e mëdha. Në dy videoklipet e fundit, jam transformuar totalisht. Shumë njerëz nuk e kanë besuar që jam unë. E kam dhunti nga zoti. Ka këngëtare që këndojnë muzikën popullore por nuk mund të këndojnë muzikë të lehtë. Mendoj se është fat një gjë e tillë.

Albumi i katërt mban përsëri vulën e të dyve.
Titullohet: “Si karamele”.
Në një nga këngët e albumit ka një refren që mua më pëlqente shumë. Ai thotë:
“E ëmbël si karamele
Ishe ti për mua xhan
Fjalët e zemrës i harrove
Që dhe vdekja nuk na ndan”

Kënga quhet “Fjalët e zemrës”, por në fakt duke menduar që mund të jetë tërheqës për tregun vendosa për këtë si titull. Është një fjalë që përdoret në gjuhën e folur të popullit: Si qenka! Si karamele!.

Këtë e keni përdorur në kuptimin e ëmbëlsisë apo të faktit që tretet ? Në kuptimin e ëmbëlsisë.

C`ndryshim ka për ju kur interpretoni drejtpërsëdrejti?
Unë këndoj shumë “live”. Normalisht që kur interpreton drejtpërsëdrejti, ke një emocion të ndryshëm nga presupozimi. Aty ti i jep ngjyrat e merituara muzikës, shpreh gjendjen tënde shpirtërore, mbushesh me emocionin e njerëzve që ndjekin me dëshirë muzikën tënde dhe që marrin pjesë në gëzimin kolektiv që shkakton muzika. Interpretimi të shkarkon emocionet dhe të sjell një çlirje të vetvetishme.

Të kënduarit nëpër koncerte të ndryshme është një shkollë për ju? Mendoj se po. Unë nuk kam mbaruar shkollë për kanto, po gjithë jetën kam kënduar. Kështu që mendoj se shumë nga armët e interpretimit i kam fituar në raportin real me publikun dhe këngën shqiptare. Mendoj se kjo është më e rëndësishmja. Kënga më tërhequr që vogëlushe. Mendoj se duke u lidhur me Ilirin, bashkëshortin tim, kjo dëshirë dhe pasion i sapoçelur u kthye në profesion. Një shkollë e madhe ka qenë Zvicra. Aty për gati dhjetë vjet, unë kam interpretuar “live” në skenë, pa lënë mënjanë dhe Shqipërinë.

Të duhet të ngushëllohesh vetëm me punë. Dhe kështu nis ajo shtysa për tu marrë me një album tjetër.
Që nga dalja në treg e albumit tim të tretë “Zhadja” nisi puna për albumin tjetër. Gjatë gjithë kohës, kam mbledhur tekstet. Im shoq ka punuar me muzikën dhe më pas jemi marrë me interpretimin. Është një punë e vazhdueshme, e përditshme. Ne kemi studio në shtëpi dhe për ne është më e lehtë. Kam dy vjet që e kam nisur dhe ka përfunduar në dhjetor .

Albumi përmban 8 këngë. Sigurisht që gjatë gjithë kohës kemi prodhuar dhe këngë të tjera, që më pas i kemi eliminuar e kështu me radhë, deri në përzgjedhjen përfundimtare. Kam realizuar dy videoklipe; një në Maqedoni me Ratin, një këngëtar shumë komercial dhe një në studiot e BBFsë.

Cilat janë raportet e shqiptarëve me muzikën. Parapëlqejnë atë të lehtën apo populloren?
Mendoj se populli shqiptar është i lidhur me muzikën tradicionale, me atë popullore. Këtë e ndjen në çdo koncert “live”. Muzika e lehtë është diçka që u imponohet, ndërkohë që muzika popullore është në gjakun e njerëzve. Ato ngrihen peshë kur dëgjojnë këngët e tyre të preferuara.

Kush janë preferencat tuaja muzikore?
Me thënë të drejtën nuk është se jam e marrosur pas një rryme muzikore. Mua më pëlqen muzika e bukur, qoftë kjo e çdo lloj zhanri apo rryme. Nuk jam e marrosur as pas emrave. Më pëlqejnë gjërat e bukura.

Cilat janë marrëdhëniet e tua me këngëtarët e tjerë?
Mendoj të mira. Nuk kam as marrëdhënie të ngushta as të thata fare. Duke qenë në çift me Lirin gjithnjë ruaj distancën e duhur.

Si është një ditë e juaja?
Normalisht zgjimin e kam në orën 11 të mëngjesit. Ritmi frenetik i jetës së natës së këngëtarit më bën të zgjohem vonë. Bëj vetëm një ngritje të detyruar që përgatis vajzën në mëngjes për në kopsht dhe pasi e përcjell atë tek autobusi, marshoj përsëri në krevat. Jam tmerrësisht gjumashe.

Më pas, kur çohem, pi një kafe me Lirin, diku jashtë dhe pastaj vazhdon ritmi i jetës së përditshme; drekë, punë në studio, takime, i përkushtohem vajzës e kështu me radhë si dita e çdo njeriu.

Kur e tepron me veshjen, a të thotë gjë Iliri?
Jo sepse ai e njeh natyrën e punës. Bile shumë herë kur sheh ndonjë veshje interesante më shtyn ta provojmë. Ka shumë shije dhe është një konsulent i mrekullueshëm mode. Tregu ka mbipopullim këngëtarësh. Dhe në përgjegjësi ekstravagancën e tepruar e përdorin ato këngëtarë që nuk kanë zë. Për të mbuluar elementin e zërit përdorin mënyra të veçanta luku, veshjesh për tu vënë në qendër të vëmendjes.

Çfarë lexoni?
Më parë kam qenë shumë më e dhënë ndaj leximit. Tani, duke qenë nënë më shumë lexoj gjëra të konsumit: revista e gazeta.

Kush është gatimi më special që dini të bëni?
Im shoq më thotë se gjëja më e mirë që unë di të bëj janë patatet musaka. Nuk i përdor shumë yndyrat. Pëlqej më shumë gatimet e thjeshta.

Emri Babeta ka qenë një pikënisje për t`u bërë e njohur?
Besoj se po. Im atë, duke parë filmin “Babeta shkon në luftë” duket se e vendosi fatin tim. Sigurisht për të hyrë në luftën e ashpër të muzikës. Dhe për të fituar.

Klikoni ketu per te degjuar disa kenge hite te saj.

Albert ZHOLI