Det, rërë, hapësira të pamasa, ndonjë çmenduri e momentit ku përzihen rrezet e diellit, uji blu dhe temperaturat e larta. Tashmë stina e verës është në kulmin e saj e mund të thuhet pa frikë se gjithsecili nga ne preferon të bëjë diçka ndryshe, të ndryshojë diçka qoftë në lookun e tij, qoftë në mardhëniet që ka me veten. E teksa të zbulosh relacionet me shpirtin është pak më shumë se e vështirë, të vëresh lookun që ka marrë kjo verë në plazhet tona është diçka që të jep novacione të përherëshme dhe të këndëshme.

Çdo vit në verë shfaqet i ashtuquajturi look i zhveshur. Më shumë se sa një tendencë kjo është dhe një kushtëzim i vapës së madhe dhe i banjove të herëpasherëshme në ujë. Por problemi i vërtetë është se një look i zhveshur nuk është aq i thjeshtë për t’u realizuar sepse look i zhveshur nuk do të thotë mostrukim, por një trukim që është sa më pak i dukshëm. Fytyrë të freskët dhe të pastër, vetullat të rregullta dhe buzët të buta dhe pa plasaritje, kjo është pamja femërore që shikohet në buzë të detit. Si është arritur?

Trukimi
Diell më prit se erdha...
Duket se këtë kanë thënë femrat shqiptare para se të udhëtojnë drejt rerës, detit e diellit. Ngjyrat e detit blu e hapur, blu e errët, e gjelbër, e smeraltë, tonalitete e së kuqes etj, sundojnë këtë verë në plazh. Trukimi me tonalitete që variojnë nga shumë të hapura në shumë të mbyllura i jep më shumë larmi relaxit. Duket e ekzagjeruar? Nuk është kështu. Dhe pse tonalitetet mund të jenë të theksuara, struktura e trukimit është trasparente gati e njomësht si deti. Të përdorura në mënyra nga më të ndryshmet, ngjyrat japin ndjesinë që kërkojnë sirenat e përkohshme të detit. Ato që pëlqejnë të duken potente dhe joshëse njëkohësisht kanë zgjedhur të bëjnë një truk më të rënduar ndërsa “të brishtat e ujit” përdorin një hijë të hollë për të arritur një efekt shumë të bukur trasparent. Sytë që vështrojnë, ngacmojnë, meditojnë të përcaktuar si një tipar për të cilin duhet të kujsdesemi shumë gjatë relaxit tonë veror, shikohen të trukuar me ngjyra të gjalla dhe me dritë. Truku varion që nga një mbulim i plotë i qepallës e deri tek një vijëzim afër qerpikëve në qepallën e sipërme. Tendenca e kësaj vere? Ngjyrat duket se nuk janë vetëm ato tradicionalet që kanë rezistuar për një kohë të gjatë në pozitën e triumfatoreve por këtë vit shikohet një përdorim i të gjitha ngjyrave verore. I njëjti trukim shikohet dhe me buzët. Freski dhe joshje. Butësi dhe trasparencë. Ngjyra e kuqe si korale e përdorur çdo vit sundon mbi pjesën më sensuale dhe këtë verë. Shkëlqyesi i buzëve është gjithmonë i preferuar për t’u përdorur. Tendenca e kësaj vere? Buzëkuqi i kristaltë me shumë pak ar. Të gjitha këto ngjyra të njomështa në fytyrë shoqërohen nga një përkujdeje trasparente për duart. Thonjtë, një tipar shumë elegant femëror përshtaten më së miri lookut prej sirene.Tendenca e kësaj vere? Vetëm manikyrë të tejdukshme. Gjatë mbrëmjes përdoret një truk më i fortë dhe i ngarkuar ashtu si dhe verën e kaluar por me një novacion që krijon komoditet për femrat, ngjyrat mbeten ato që kanë sunduar gjatë ditës veç më të theksuara.

Flokët
Kujdes i veçantë, look ndryshe... ja dhe disa ide:
Kush i ka flokët me kaçurrela të dendur, për të luftuar efektin e fryrjes mund të aplikojë mbi flokë të lagur së bashku me xhelin apo shkumën dhe një vaj flokësh. Përziejini të dy përbërësit në dorë dhe aplikojini në flokë. Vaji përveçse kuron flokët i jep atyre një efekt të lagur shumë modern. Më pas lerini flokët të thahen vetë për një look sa më natyral. Kush i ka flokët e drejtë mund të ndryshojë krehje duke bërë gërsheta kur flokët janë akoma të lagur dhe pasi të thahen duke i lëshuar flokët, do të mbeten me onde dhe të valëzuar si sipërfaqja e detit, ashtu si është dhe moda e fundit. Krehje të tjera moderne sidomos për ata që janë në plazh janë gërshetat dhe bishtat gjithmonë të ulura poshtë si indianët. Kush i ka flokët e gjatë mund të bëjë dhe një bisht kali në pjesën e sipërme të kokës për një pamje më të sofistikuar.

Veshje
Kostum banjoje apo bluzë? Pse jo të dyja?
Veshje plazhi apo veshje mbrëmjeje? Një dilemë e bezdisëshme kjo deri këtë vit për femrat, se çfarë veshjesh duhet të merrni më shumë gjatë pushimeve. Por tendenca e këtij viti duket se e ka zgjidhur dhe këtë problem. Nuk ka pse të na vijë çudi kur të shikojmë këtë verë që një vajzë ka veshur gjatë mbrëmjes rrobat e saj të banjos. Është një dukuri që ka nisur këtë vit tek femrat në buzë të detit, veshjet janë shumë funksionale. Mund të mbahen veshur në shtëpi, në plazh apo dhe në festa verore. Të kaltra si deti, të arta si dielli, të argjenta si hëna. Këto janë ngjyrat që sundojnë këtë verë në plazh për t’u dukur si dea greke. Një kostum banjoje trup?! Më i preferueshmi këtë verë që kërkon më shumë komodidete në krahasim me verën e shkuar. Femrat ndihen mjaft komode për të notuar, për të luajtur dhe gjatë mbrëmjes kostumi shndrrohet një bluzë perfekte. Modelet e fundit janë të gjitha shumëngjyrëshe dhe seksi. Perfekte për të vrapuar. Tashmë e dimë të gjithë që stilistët janë të prirur të frymëzohen nga e shkuara. Vitet 50 janë kthyer në modë. Vitet 70 dhe 80 vazhdojnë që të frymëzojnë linja dhe stile por për këtë verë stilistët kanë shkuar dhe më thellë në kohë duke rinterpretuar veshjet e Romës antike. Në pasarela janë parë shumë veshje të buta qoftë të shkurtra, qoftë të gjata në ngjyra të arta dhe të argjenta. Funde të gjatë sportivë, bluza të gjëra dhe pantallona të ngushta dhe sexy natyrisht apo minifunde që janë vërtet minifunde. Por sa ndiqet kjo modë e pasarelave në plazhet tona? Mund të themi se është mishëruar plotësisht në trupat femëror shqiptarë. Si është interpretuar ky stil buzë bregdeteve tona? Gjatë ditës përdoren më shumë këmishat e gjëra ndoshta dhe josimetrike që lenë një sup të zbuluar. Rregulli kryesor që po ndiqet këtë verë është: rroba të gjëra në pjesën e sipërme të trupit dhe të ngushta në pjesën e poshtme ose e anasjellta. Rrobat e shkurtra dhe të gjëra janë ideale për një mbrëmje verore. Vishen me sandale të sheshta ose ato që janë më të përshtatëshme, sandalet me takë të lartë. Fustanet e gjatë janë të përsosura për mbrëmje më formale dhe sigurisht që vishen me sandale me takë të lartë dhe shumë sexy.

Minifundi
Minifundi sportiv që kemi parë në pasarelat dimërore ka zotëruar plotësisht këtë verë në bregdet. Vera e 2003 duket se është tërësisht nën sundiminn e minifundit. Funde shumë të shkurtër bluza shumë të vogla…gjithçka lejohet vetëm që të duken këmbët. Vajzat i kanë thënë “mjaft” stilit folkloristik shtresë mbi shtresë. Më së fundi është ndryshuar taktikë. Shumllojshmëria e këtyre minifundeve nuk le vend për asnjë justifikim të vlefshëm për mospërdorimin e tyre. Nuk ka rëndësi në qoftë se je romantike, sportive, klasike apo sensuale-do të gjesh me siguri pjesën më të madhe të vajzave që veshin minifunde dhe bluza të shkurtra që i përshtaten më së miri tipit të tyre.

Çanta
Një nga aksesorët më të rëndësishëm të plazhit është dhe çanta. Mjafton që të jetë e madhe për të qëndruar në supet femërorë. Me një hapësirë sa më të bollshme në mënyrë që të mbajë brenda gjithçka që nevojitet gjatë një dite të gjatë e të lodhshme plazhi. E tillë është çanta e plazhit këtë verë por vajzat nuk janë mjaftuar vetëm me madhësinë sepse një vëmëndje e veçantë i kushtohet dhe materialit, ngjyrave dhe dekorit të saj. Më të preferuarat mbeten gjithmonë ato me formë trapezi me dekoracione të bëra me dorë. Janë çanta të ngjashme me ato që ju jepej ushqimi kuajve në ditë festash të mëdha. Gjithmonë të preferuara mbeten dhe çantat e punuara me kashtë dhe të zbukuruara me lule, peshq të vegjël apo forma të tjera shumëngjyrëshe. Të pëlqyeshme janë dhe çantat e mëdha prej plastike të tejdukshme njëngjyrëshe. Në qoftë se plazhi është larg apo shkohet vetëm me barkë, e dini se cilat janë modelet e reja të preferuara nga plazhistët shqiptarë? Çantat si thes në formë gjatësore të stilit marinë jo më me ngjyrat blu, të bardha apo të kuqe, por me viza dhe me shumë lule, version i prakticitetit.

Hidroterapia
Kush tha se shqiptarët nuk kujdesen për fizikun gjatë pushimeve? Mjafton të bësh një xhiro gjatë bregdetit, qoftë atij jonian, qoftë atij adriatik për të kuptuar se shumçka ka ndryshuar në këtë drejtim. Përdorimi i ujit për kurimin e trupit është një traditë e lashtë dhe e përhapur në të gjitha kulturat. Sigurisht që ndryshe nga e kaluara sot hidroterapia është një art i vërtetë: nuk mjafton që të futemi në një vaskë me ujë të freskët për t’u ndjerë të lehtësuar dhe për të larguar shqetësimet shëndetësore dhe psikologjike. Në këtë lloj terapie nuk është uji në vetvete që kuron, por mënyra me të cilën uji bie në kontakt me trupin dhe mbi të gjitha alternimi i temperaturave të ngrohta dhe të ftohta gjë që po aplikohet gjerësisht këtë verë. Për të qenë realistë duhet të pranojmë se kujdesi i meshkujve shqiptarë për lookun lë shumë për të dëshiruar megjithatë dhe ata sjellin tendencën e kësaj vere në trupat e tyre. Si?! Mos u çudisni kur këtë vit në plazh të shikoni trupa mashkullorë që u ngjajnë “seksit të dobët”nga depilimi i qimeve dhe “seksit të fortë” nga tatuazhet e shumtë. Ç’kontrast i madh në maskilitetin shqiptar!

Mariza Ikonomi : “Flokët, shqetësimi im për këtë verë”
Kështu këngëtarja e njohur Mariza Ikonomi thotë se dëshiron të sjellë një tendence këtë vit për t’u ndjerë paksa ndryshe me veten e saj por preokupimi më i madh tani për tani për të janë flokët. “Kam bërë shumë eksperimente me to dhe më duhet që të kujdesem shumë gjatë pushimëve të kësaj vere për të pasur diçka të re në lookun tim dhe për të rimëkëmbur mirëqënien e flokëve të mi”. Ndërsa për sa i përket aksesorëve dhe veshjeve nuk do të ketë ndonjë ndryshim nga ato të vjetshmet.

Olta Daku tashmë pasi i ka kaluar krizat e “çiftit të shqyer” kërkon të pushojë pa u preokupuar shumë për tendenca të reja por me dëshirën për të kaluar pushime në Spanjë. Ajo thotë: “Nëse do të më plotësohej kjo dëshirë do të isha shumë e lumtur. Çmenduri të tjera pastaj do të ketë, por janë shumë intime dhe nuk mund të përbëjnë një tendencë që i përket të gjithëve.”