Të kesh apo të jesh, një dilemë e vështirë, për të qenë i pranishëm në pasarela. Janë të pashëm dhe joshës, me çdo kusht duan të futen në rrugën e modës. Është kaq e vështirë sa mundësitë e një tregu që pothuajse nuk ekziston, u vështirëson rrugën.

Deri tani kanë provuar të dorëzohen para objektivit të fotografit, të pozojnë shkujdesur me gjithfarë veshjesh, firmato ose jo qofshin ato. Nuk mungojnë as në sfilatat e pakta që jeta e metropolit ofron, por edhe këtu nuk është kaq e lehtë. Me miq, psherëtijnë shkujdesur, duke rrufitur të disahertën kafe. Është ky kushti i vetëm për t'u hedhur në treg si një produkt, që doemos duhet të ketë jetëgjatësi. Shumë pak konsumim dhe mbi të gjitha një imazh, që kurdo qoftë mund t'u mbushë mendjen biznesmenëve, për të firmosur kontratat e ndonjë reklame, shuma e të cilave, janë të pallogaritshme. Kurrsesi jo aq shumë sa të lodhesh duke i numëruar, por çikërrima monetare, që nuk të mjaftojnë për kafe, ndërsa për rroba apo trajtimet estetike, nuk mund të bëhet fjalë.

Në këtë botë të munguar pasarelash, të rinjtë kryeqytetas tentojnë të provojnë, sesa bukuria vlen, edhe pse krahasuar me etalonin financiar, pothuajse është i papërfillshme. Pothuajse të gjithë pranojnë se në Shqipëri është vështirë të bëjnë karrierë. Shumëkush prej tyre rrezikon të provojë jashtë, Tirana, nuk ofron asnjë mundësi në këtë fushë. Duan të provojnë me çdo kusht pasarelat evropiane, qofshin edhe modelë të dorës së dytë, një sakrificë kjo për të cilën modelët e rinj shqiptarë pohojnë se ia vlen të rrezikosh.

Enea Kondi
“Unë, imazhi i vetvetes”
Djaloshi i dinastisë Kondi, ka ndier ethet e pozimit dhe ecejakeve në pasarele, qysh kur ka qenë kërthi. Aty nga mosha 16 vjeç, kur qimet e mjekrës sapo kishin nisur t'i zhubravisnin fytyrën njomëzake. I ngatërruar mes fustaneve që stilonte e ëma Zina Kondi, kishte provuar se veshja, është po aq e rëndësishme, sa edhe inteligjenca. “Mund të vlerësoj një njeri, vetëm duke i parë këpucët”-pohon ish basketbollisti 19 vjeçar nga Brraka. Ai ka nisur të marrë leksionet e para të modës, atëherë kur nuk i hynin fare në punë. Me një gjyshe që gjithë jetën kishte qepur dhe një nënë që i kishte qëndruar si çekiç mbi krye, Enea Kondi, nuk kishte për të menduar ndryshe. Aty nga gjimnazi, beson vërtet se jeta e tij morri kthesën e madhe. Aspak ndërdyshas, i kaloi në tru, ideja e të qenit i pranishëm në pasarela, të pozonte para fotografit për të nxjerrë në pah sharmin e një njomëzaku, që u përpi menjëherë nga tregu. I përfshirë në rrëmujën e sfilatave, aty pas kuintave duke ndjekur dhe ndihmuar të ëmën, pinjolli i familjes Kondi, tregon se përpos pasarelave i pëlqen edhe organizimi i ngjarjeve të këtij kalibri.

“Nisa të aktivizohem seriozisht në sfilata, fill pas pjesëmarrjes time në Mister Albania. Më pas e kuptova që fotoja të jepte një emocion ndryshe. Nisa të pozoj për Mister Trendy dhe kështu u dorëzova pas leksioneve të para fotografike, sesi duhet të sillesha si një model para aparatit fotografik të Albes Fushës”-rrëfen Enea. Kjo eksperiencë dhe emocioni i imazheve të gdhendura në celuloid, do të ishin të pashlyeshme. Një set fotografish, që do të mbërrinte në redaksinë e revistës italiane Maxim, ishte hapi më guximtar. Fill pas kësaj fotot e djaloshit kryeqytetas, u përdorën në një reklamë kravatash për koleksionin e Laura Biagotit. “Kjo është maja që kam arritur për momentin, duke patur parasysh që në një shoqëri të varfër si kjo e jona, të qenit model është luks”-tregon ai. Nëse e pyet se cili do të ishte ikona e pasarelave, pa asnjë mëdyshje të thotë “UNË”.

Ky investim i paparashikueshëm, e bën të ndihet më i sigurt në vetvete, të jetë me kërkues, këmbëngulës dhe pse jo edhe xhelozi, e cila buron nga shpirti i garës. “Imazhi im do të jem vetë unë. Eksperienca ime në këtë fushë dhe pasioni që kam, më bën të punoj aq shumë sa në një kohë kur të tjerët, do të shohin se ai djaloshi që nuk reshte së investuari për vete ia ka dalë mbanë. Atëherë do të jem unë ai që do të vendos për vetën time dhe të tjerët vetëm do të ofrojnë. Kështu do të zgjedh të përdor imazhin tim”- thotë ai. Është një investim pa kursim që një adoleshent i moshës së tij as që do të kishte kurajon të paktën të kishte provuar. Investimi fizik për të, shmang anën financiare aktualisht, pasi e di që pagesat e tregut janë shumë të vogla. Ndoshta nesër do të mbledhë frytet e një mundi të derdhur. Do të ketë me se të krenohet, mes miqsh, por edhe në familjen e tij, ku tradita padiskutim, ka patur ndikim të në rrugën e pakthyeshme të modës. Shkolla që sapo ka nisur në Fakultetin ekonomik do ta ndihmojë të djaloshin të administrojë veten, pse jo në të ardhmen edhe një agjenci që mund të jetë totalisht e tija. Ku i dihet edhe me emrin e tij.

Florent Fejzullahu
“E ardhmja ime, jashtë Shqipërisë”
Tre vjet më parë, kur sapo kishte vënë këmbën në atdhe, të qenit një model i ishte dukur pothuajse e pamundur. Edhe pse kishte në xhep certifikatën e një kursi modelësh nga Milano, nuk ishte aq e lehtë për të bërë karrierë.Një 21 vjeçar si Florent Fejzullahu, do të kishte hequr dorë sa hap e mbyll sytë, përballë mungesës së konkurrencës dhe një neglizhence dosido ndaj një sharmit të tij. “Konkursi i bukurisë Mister Albania 2003, ishte e vetmja portë, e cila do të më lejonte që të dilja si duhet të treg. E dija që ishte e vështirë, madje nuk pretendoja të fitoja ndonjë çmim.

Kjo eksperiencë më vleu aq shumë, sa tani që e mendoj, padiskutim ky spektakël pati jo pak ndikim në të ardhmen time si model”-tregon bukuroshi Florent Fezullahu. Fill pas kësaj ia behën ofertat. Disa sfilata, ku edhe këtu duhej mik për t'u angazhuar. Mania e reklamave, mbetet një tjetër mundësi për t'u afirmuar nëse ke vërtet një bukuri mashkullore që ia vlen të hidhesh fuqishëm në treg. Për Florentin nuk ka qenë kaq e lehtë. Prej kohësh është duke ndjekur një dietë të rreptë, për të arritur normën e një trupi të lakmuar.

“Nëse kur erdha nga Italia kisha një trup muskuloz tani më duhet që të ndjek një dietë të rreptë, për të humbur kilet e tepërta.

Brenda pak kohësh kam humbur jo pak por 12 kilogram nga 86 që isha tani jam plot 72”-tregon bukuroshi i reklamave, të cilit i është dashur të kalojë goxha kohë duke u privuar nga të ngrënit, madje edhe po kaq kohë në palestër, për të mos humbur format e trupit. Tani e pret një tjetër sfidë. Jo më si ato sfilatat e rëndomta, paksa të izoluara nga publiku, ku pas trupit ngjesh rroba që vetëm Made in Albania mund të jenë. “Kam patur një propozim të lakmueshëm nga Adriana Karembeu, një emër i njohur i modës në Francë. Do më duhet të jap më shumë, për të pasur format që ajo kërkon, pasi për fytyrën më ka dhënë viston”-shpjegon Fejzullahu, pa fshehur nga sytë shkëlqimin dhe entuziazmin që i jep kjo ofertë. Bëhet fjalë për Francën, Parisin sigurisht, ku mund të gjesh gjithfarë modelësh në një treg pambarimisht meshkujt që luftojnë për të dalë sipër.

Ajo që e bën të hidhet pupthi për momentin, është një tjetër ofertë. Ai tregon se është zyrtarizuar tanimë pjesëmarrja e tij në një nga konkurset më prestigjioze të bukurisë mashkullore. Bëhet fjalë për Best Model, që pritet të startojë me 3 dhjetor në Turqi. “Fotot që kam dërguar janë pranuar zyrtarisht. Shumë shpejt do të nisem. Ky është një shans që nuk duhet humbur. Gjithçka ia kam lënë në dorë një menaxhereje kosovare, e cila po merret me organizmin”-thotë ai. Për Florentin Shqipëria është larg realizimit të ëndrrës së tij. Franca mbetet ëndrra e tij. Vetëm aty mund të shkelë në pasarala, qoftë edhe nëse do të mbetet përjetësisht model i dorës së dytë.

“E ardhja ime në fushën e modës mund të konkretizohet vetëm jashtë vendit.

Ai mendon se në Tiranë, për momentin është e pamundur të jesh dikush, pavarësisht investimit dhe sakrificave që do t'i duhet të bëjë, madje me çdo kusht, vetëm për të qenë një prej atyre. Kurrsesi si i preferuari i tij Tyson Ballou. Fundja në këtë garë do të mbetet sërish djaloshi çapkën që nuk heq lehtë dorë nga ëndrra e tij.

Pol Babi
“Në pasarelë me çdo kusht”
Një vit më parë, pak para se të ishte shpallur modeli më i mirë i vitit, ato që i pëlqenin tek vetja, nuk ishin gjë tjetër veçse impresione miqsh. Por kur gjithçka u zyrtarizua, u bind se ia vlente që t'i futej si duhet kësaj fushe. Pol Babi, studenti që lë pa gojë moshatarët e tij, mëngjeseve kur hyn në Universitetin e Kamzës, realisht është shumë ndryshe. Buzëqeshjet nuk ia kursen kurrkujt, jo më për të qenë në qendër të vëmendjes apo sepse këtë ia imponon profesioni i sapo nisur, por sepse brenda është vërtet i tillë. Me një pamje njomëzaku, Pol ka nisur të aktivizohet në pasarela qysh kur ishte 15 vjeç. “Emocioni i parë që kam përjetuar, ka qenë aty nga viti i dytë gjimnaz, kur u shpalla modeli më i mirë i vitit në Rinfest. Përpiqesha të përsërisja në lëvizjet e mia atë çfarë kisha fotografuar në kujtesën time duke ndjekur Fashion TV dhe ia dola”-tregon Babi. Por kur fitoi çmimin e tretë në Mister Albania, pothuajse e ardhmja e tij ishte vulosur përfundimisht.

Prindërit i kishin dhënë zemër. Edhe shoqëria po ashtu. Të gjithë e nxisnin që mos linte asnjë shans për t'i humbur, me të vetmin qëllim : pasarelat. Edhe pse të pakta, ai krenohet se ka qenë një ndër të preferuarit. Nuk i kanë munguar ofertat, madje edhe tani me një të tillë po merret. “Java e Modës Italiane ishte një trampolinë e cila me mësoi se pasarela kërkon vërtet profesionalizëm. Aty mësova do gjëra, që më vlejtën. Edhe reklamat po ashtu, ndërsa videoklipet me kalitën vërtet durimin para kamerës. Një sprovë, kjo e cila më shtyu që të përfshihesha në një set fotografik”-tregon modeli i ri, që mban mbi shpinë, jo pak por 3 triumfe, brenda një periudhe të shkurtër. Por kur djemtë në tregun e modës janë si ujët e pakët, për Polin ky vërtet është një avantazh.

Disa syresh që pothuajse numërohen me gishta, kanë krijuar një grup të vogël, brenda të cilit qarkullojnë edhe ofertat më të fundit. Jo vetëm për të bërë ca ecejake në skenë, por edhe për të siguruar një buxhet, sadopak qoftë ai për të përmbushur kërkesat që ai ka. I duhet të investojë fort për lookun e tij, por jo dhe aq mjaftueshëm, pasi tregu tashmë njihet. “Përpiqem të bëj sa mundem vetë. Flokët dhe veshjet, janë totalisht kombinimet e mia. Kujdesem normalisht çdo ditë, për të qenë sportiv në mëngjes, kur jam në shkollë, ndërsa në mbrëmje tentoj të zgjedh mes të qenit casual dhe klasik”-pohon Pol. Edhe pse krahasuar me kolegët, ka arritur të mbledhë frytet e punës dhe sharmit të tij brenda një kohe shumë të shkurtër, Tirana, nuk është vendi ideal për të bërë karrierë. Milano është vendi i preferuar për modelin e ri. Mosha po ikën dhe realisht në këtë pikë duhet të ishte i përfshirë fuqishëm në tregun e modës, por këto janë hapësirat që ofron tregu.

Nuk do të lërë pa provuar edhe këtë mundësi. Milano vazhdon ta tundojë. Verën që vjen do të sakrifikojë duke lundruar drejt Italisë për të provuar shansin e tij, edhe pse i bindur pohon se është e vështirë. Pasioni për modën që e ka shoqëruar që në moshë të vogël nuk e ndal kollaj. Për më tepër prindërit nuk i kanë kursyer gjë. E ëma nuk mungon në asnjë sfilatë dhe shpesh e inkurajon për të ecur më tej. Padyshim edhe për një tentativë drejt pasarelave milaneze.

Elona Gjermeni