Koncerti i madh i Krishtlindjeve është dhënë mbrëmë me 25 Dhjetor, në Pallatin e Kongreseve.





Mula-Gjebrea, surpriza e Krishtlindjeve.

U shfaqën fare natyrshëm në skenën ku ajo kishte kohë që nuk këndonte, ku dhe ai kishte kohë që nuk këndonte gjatë, në një koncert të plotë. Nisën të këndonin fare qetë në skenën ku mbretëria e Krishtlindjeve kishte zbritur magjishëm, me pemën e madhe (e cila ishte marrë nga pyjet e Përmetit), me yjet, me këmbanat, me lulet e qirinjtë, simbole të kësaj feste të shenjtë. Me sfondin e kuq, nga pas supeve të tyre, Inva Mula dhe Ardit Gjebrea nisën kështu ta parin koncert shqiptar, kushtuar Krishtlindjeve. Kishte munguar deri më sot një spektakël i tillë, ashtu siç i kishte munguar asaj skene zëri i magjishëm i Inva Mulës. Por edhe Mulës i kishte munguar ajo skenë ndaj emocioni që përjetoi në çastet e para kur u shfaq përpara publikut, e mbërtheu të tërën. Me zë të dridhur e përshëndeti sallën. Me zë të dridhur arriti të thoshte se atë emocion dëshironte ta ndante me të gjithë të pranishmit në atë sallë dhe vërtet duartrokitjet e ngrohta ia qetësuan paksa zërin-“Është mirë që të jemi gjithmonë bashkë, në të tilla festa”-tha së fundi ajo, e pastaj nisën bashkë me Gjebrenë këngën “One god”… “O vemi o s’vemi”.

Tingujt e muzikës janë ndërprerë për disa sekonda. Vendin e tyre e zunë këmbanat…derisa Timo Flloko u shfaq në skenë. Interpretoi vargjet që vetë i kishte shkruar vetëm tre-katër ditë përpara atij koncerti. Kur ai ngjit shkallët për të ikur e kur këmbanat pushuan së rëni, Mula u shfaq sërish e veshur me një fustan në ngjyrë bojëqielli. Dukej si një ëngjëll që sapo kishte zbritur mbi atë skenë. E në krah të saj, Gjebrea, si gjithnjë, ishte një zotëri i vërtetë. Edhe pse i ka “gëlltitur’ shumë shpesh emocionet që të ngjall ajo skenë, Gjebrea u dorëzua sërish ndërsa u rrëfye se ky koncert shënonte rikthimin e tij tek dashuria e vjetër…tek kënga-“Sot më mungon mikrofoni dhe letrat e prezantimit sepse unë sot nuk do të kem rolin e drejtuesit të një spektakli. Sot jam këngëtar dhe jam shumë i gëzuar që këtë rikthim në dashurinë time të vjetër e bëj në krah të së madhes Inva Mula”. Pas këtij rëfimi të sinqertë, Gjebrea u ul në piano e nisi të këndojë ashtu siç ka bërë shpesh në ambiente familjare, me miqtë e ngushtë, ashtu siç nuk kishte bërë asnjëherë në skenë. Nga tastjera e asaj pianoje këngët rrodhën një pas një… “Kur të jesh mërzitur shumë”, “Pendesë”, “Të dua” së cilës iu bashkua dhe Inva Mula (tashmë e veshur me një fustan të kuq).

Pastaj Mula mbeti e vetme në skenë me “Ave Maria” dhe me duartrokitjet e gjata që nuk kishin të sosur. Në mes të atij entuziazmi ftoi në skenë, njeriun e saj të zemrës, Pirro Çakon. Ai këndoi një këngën “Xhuli” tekstin e të cilës e kishte shkruar Teodor Keko-“Homazh për Teodorin dhe për dashurinë njerëzore, për të cilën ne kemi shumë nevojë”,-kaq tha Çako dhe nisi këngën pastaj, ndërsa duartrokitjet ende nuk ishin qetësuar. Nën tingujt e fundit kushtuar “Xhulit”, Inva iu afrua në krah. Ashtu pranë njeriut të saj të zemrës, Inva tha-“Shumëkush është frymëzuar nga “Mall”, nga vargjet e të madhit Kadare. Mbi këto vargje Pirro ka realizuar krijimin e tij të parë. Ne po i rikthehemi kësaj këngë për të përshendetur mësuesit e maturës. Unë Pirro dhe Arditi kemi qenë shokë të një klase dhe sot festojmë një përvjetor.” Ndërsa këndonin këtë këngë, mësuesja e tyre kujdestare u ngjit në skenë dhe u dhuroi një tufë me trëndafila. Inva Mula e prezantoi për të tërë pa e fshehur aspak emocionin që e kishte kapluar në ato çaste.

Pas kësaj atmosfere të ndezur, në skenë janë shfaqur një grup balerinësh (nxënës të Liceut Artitik). Pas tyre, Inva Mula ka kënduar “Mon amur”, nën një ritëm krejt ndryshe nga ay që ishte kënduar më parë. Së bashku me Arditin kanë falenderuar artistët që i ndihmuan për realizimin e këtij koncerti…Robert Radojën, Avni Mulën, Thoma Gaqin e Endri Sinën që punuan me muzikën. Tatjana Sinon që punoi me korin e Liceut Artitik, Adelina Mulën që punoi me kompleksin dhe mbi të gjithë dirigjentin Ermir Krantja dhe orkestrën e Radio-Televizionit shqiptar që i shoqëroi “live” në këtë koncert i cili do të transmetohet në ekranin e TVA-së natën e Vitit të Ri, dhe në ekranin e TV21 të Kosovës.

Këngët e gëzueshme të Krishtlindjeve (edhe të shqipëruara) i kanë dhënë një tjetër ngjyrë sallës. Edhe zilkat që tundeshin në duart e fëmijëve, edhe fishekzjarret që u ndezën furishëm mbi skenë. Pas urimit “Ju urojmë Krishtlindjet dhe Vitin e Ri”! nën tingujt e këngës së njohur “WE Wish you a merry Kristmas” dhe pas fikjes së fishekzjarreve, publiku mendoi se koncerti mbaroi. Por jo. Në qetësi dhe në gjysëm errësirë, Ardit Gjebra dhe Inva Mula kënduan të fundit këngë të koncertit “Mesnatë kristiane”…duke i uruar të gjithëve një natë të mirë.

Kur koncerti ende nuk kishte filluar
Shqetësimi i mbartur ditë pas dite në përgatitjet e fundit, ua kishte lodhur sytë, secilit prej tyre…edhe Grabockës, edhe Mulës, edhe Gjebresë. Paksa të lodhur ishin edhe sytë e Timo Fllokos e të Pirro Çakos. I lodhur ndihej edhe Ermir Krantja. E megjithatë dje, në provat gjenerale, ata ishin më të qetë se në ditët e tjera. Gjithçka ishte vënë në vijë. Gjithçka po shkonte ashtu si duhej mbi skenën e madhe të Pallatit të Kongreseve, aty ku duart e skenografit Bashkim Ahmeti e kishin ndërtuar atmosferën e Krishtlindjeve, fare të thjeshtë e shumë mahnitëse. Në ato orë të pakta të mbetura nga fillimi i këtij koncerti (në orën 20.00) regjisorja po ngjizte gjithë elementet e spektaklit, pa lënë asgjë jashtë vëmendjes…lulet, qirinjtë, flluskat e ujit (ato që do dukeshin si fije dëbore)…edhe me protagonistët e këtij koncerti, sigurisht. Gjebrea dhe Mula ndiqnin me vëmendje gjithë udhëzimet e saj, ndërsa provonin njëra pas tjetrës materialet që kishin përgatitur enkas për këtë natë. Mjaft sportive (e veshur me xhinse) Inva Mula lëvizte si një çapkëne e vogël mbi atë skenë. Sytë i shkëlqenin nga kënaqësia…ndihej si në shtëpinë e saj. Ndërsa zbret nga skena, për të marrë ca partitura të thotë shpejt e shpejt se ndihet shumë e lumtur mbi atë skenë, ndërsa këndon e shoqëruar nga orkestra e Radio-Televizionit shqiptar. Ndihet entuziaste që do shfaqet përpara publikut, pikërisht në ditën e madhe të Krishtlindjeve gjë të cilën prej kohësh e kishte dëshiruar. Pastaj ikën me vrap, në krah të Arditit për të kënduar duetin e radhës. Si gjithmonë, edhe këtë herë, Gjebrea shfaqet më pak entuziast në provat gjenerale. Lëviz nëpër sallë më i qetë se gjithë të tjetër…dhe shumë mendueshëm. Shpërthen vetëm, aty në skenë ku ndihet zot i gjithçkaje. Kishte kohë pa kënduar aq shumë e aq gjatë, pasi në këto kohë i është përkushtuar më shumë prezantimit të spektakleve që ka ndërtuar së bashku me Grabockën. Ka kënduar një ose dy këngë dhe kaq. Ndërsa tani është krejt ndryshe. Mbrëmë, Gjebrea ka qenë në krah të Mulës për të kënduar gjatë e gjatë deri në fund të koncertit. E bashkë me ta ka kënduar dhe Pirro Çako…si shokë të një klase, tashmë të rritur në moshë dhe në karrierë.

Emocionet e Avni Mulës
At e bijë
Askush veç Avni Mulës, nuk ia qartëson mendimet Inva Mulës. Në asnjë skenë ku ngjitet (kudo qoftë kjo skenë) ajo nuk mund të ndihet e mbushur nëse nuk e ka të atin diku të ulur në ndonjë karrige të sallës. Vetëm në herën e fundit, ndërsa këndonte “Traviatën” në Londër, prindërit nuk mundën të ishin në atë sallë. Ndërsa dje, në provat gjenerale, babai i saj e ndiqte ngado dhe ajo në çdo çast kërkonte sytë e tij. Sapo mbaronte një pjesë i afrohej dhe dëgjonte me kujdes gjithë ç’i thoshte ai. E ndërsa ajo ngjitej në skenë, pas kësaj, e ndërsa ajo mbushte sallën me zërin e saj të mrekullueshëm…sytë e babait mbusheshin me lot- “U bënë vite që e shoh tek shkëlqen në skenë,-thotë Avniu-por çdo herë është diçka ndryshe nga ajo që kalon. Mbushem me kënaqësi kur e shoh të këndojë në skenën shqiptare”. Avniu tregon se një pjesë të mirë të materialeve e këtij koncerti i ka zgjedhur ai vetë. Ka marrë rolin e drejtorit artistik (sidomos për Invën) ndaj tregohet i rreptë, e nuk lë asgjë të devijojë nga magjia e këtij koncerti. Më i rreptë se më çdo kënd ai është me bijën e tij Invën. Kështu kanë bërë gjithmonë, që kur ajo ishte fare fëmijë, kur nisi të hidhte të parat hapa të karrierës së saj edhe atëherë kur shënoi të parat suksese në skenat botërore. Edhe kur s’e ka pranë, përmes telefonit, ajo kërkon udhëzimet e tij, sepse vetëm ai mund t’ia qartësojë mendimet.