Teatri Kombëtar promovon ambientet e rikonstruktuara me “Portretin e Dorian Greit”, dramë e shkruar nga Oskar Wilde dhe e vënë në skenë nga Kiço Londo.





Drama do të rivihet në skenë më 11 janar.

Dorian Grei kthehet në Teatrin Kombëtar.
“Portreti i Dorian Greit”, drama e shkruar nga Oskar Wilde do të ngjitet sërish në skenën e Teatrit Kombëtar. Kjo do të jetë shfaqja e parë që ngjitet në skenën e këtij teatri, menjëherë pas rikonstruksionit të pjesshëm të ambienteve të këtij teatri.. regjisori Kiço Londo pohon se puna për rivënien në skenë të kësaj shfaqjeje, ka nisur që nga data 15 dhjetor dhe që nga shfaqja e vënë në skenën e këtij teatri në muajin maj, rivënia në skenë e saj vjen me disa ndryshime. Aktorja që përdhunohet nga Dorian Grei, që më parë luhej nga Anjeza Maja, tashmë do të jetë një tjetër aktore, e cila do të mishërojë figurën e kësaj aktoreje ëndërrimtare. “ Në vend të Anjeza Majës, e cila ka qenë e aktivizuar gjatë gjithë këtyre kohëve me garat e miseve në “Mis Bota” dhe “Mis Evropa”, kam aktivizuar aktoren Ermela Teli”,- thotë Londo, duke shtuar se përveç saj një ndërrim mund të bëhet edhe për aktorin Neritan Liçaj, i cili po përgatitet të ngjitet në skenë me premierën e dramës “Zoo story”.

Ndërsa në rolet e tjera do të jenë po të njëjtët aktorë, Ndriçim Xhepa, në rolin e Dorian Greit, Bujar Lako, në rolin e artistit me një fat tragjik, Fatos Sela në rolin e Henrit, etj Kostumet e skicuara nga Durim Neziri dhe skenografia e krijuar nga Kristo Çala, do të jenë po në të njëjtat stade që kanë qenë në shfaqjen e premierës së kësaj shfaqjeje. “Portreti i Dorian Greit”, është historia e korruptimit moral përmes mjeteve të esteticizmit. Artisti Bazil Holluord vendos të riun Dorian Grei në lidhje me portretin e tij. Pasi bisedon me cinikun Lord Henri Uoton, Doriani bën një urim që e ndikon llahtarshëm jetën e tij përgjithmonë. “Sikur unë të isha unë ai që mbetet gjithmonë i ri dhe ai që plaket të ishte portreti! Për këtë do të jepja gjithçka! Do të jepja shpirtin tim për këtë!” Siç del më pas, djalli të cilit Doriani i shet shpirtin është Lordi Henri Uoton, që ekziston jo vetëm si diçka jashtë Dorianit, por edhe si zë brenda tij. Doriani nis të bëjë një jetë sensuale, të cilën e mëson nga një libër që ia jep Lordi Henri. Drama nënvizon mosmiratimin ndaj esteticizmit, që ka një impakt negativ mbi personazhet kryesorë. Seicili prej tre personazheve parësorë është estet dhe has një lloj ndëshkimi të tmerrshëm.

Esteticizmi i Bazil Holluordit manifestohet në përkushtimin e tij ndaj krijesave të tij artistike. Ai kërkon në botën e jashtme manifestimin perfekt të shpirtit të tij dhe kur e gjen këtë objekt, ai mund të krijojë kryevepra duke e pikturuar atë. Ai refuzon ta ekspozojë portretin e Dorian Greit me arsyetimin se “Unë kam vënë shumë nga vetja në të”. Ai demonstron më tej se deri në ç’masë i përmbahet kësaj filozofie kur deklaron më vonë se “vetëm artisti zbulohet vërtet. Lordi Henri Uoton e kritikon Bazil Holluordin se “artisti duhet të krijojë gjëra të bukura , por nuk duhet të fusë asgjë nga jeta e tij në to”. Ironikisht qëllimi i ekzistencës së Bazil Holluordit është të jetë një estet që mundohet të bëhet njësh me artin e tij. Por këtë vepër arti (Portretin e Dorian Greit) ai refuzon t’ia japë Dorianit kështu që këtij të fundit i krijon idenë se nuk ka pasoja për veprimet e tij. Me këtë besim në mendje Doriani vret Bazilin.

Që këtu ngjarjet nisin e marrin rrokopujën. Drama, lirizmi dhe tragjizmi mbështillen në një dhe fundi vjen vërtet i dhimbshëm. Kjo është drama që tërhoqi majft vëmendjen në premierën e saj. E konsideruar si një nga shfaqjet e suksesshme të sezonit të kaluar “portreti i Dorian Greit” u vlerësua nga mjaft kritikë dhe artistë të tjerë të teatrit. Pas shfaqjeve për dy fubnjava rresht në Teatrin Kombëtar kjo dramë mund të vihet edhe në skenat e rretheve, si në Elbasan, Korçë, etj. Pas Dorian Greit, në skenën e teatrit Kombëtar po punohet për t’u ngjitur në skenë “Ngjarje në zoo” me regji të Kastriot Çipit e menjëherë pas saj do të vihet në skenë “Pentakost” me regji të Atben Kumbaros.